Studentja Livia Dedej: Protesta u përket qytetarëve, jo partive politike

Studentja e Psikologjisë, Livia Dedej, deklaroi në emisionin “Review” të Euronews, të moderuar nga Greta Topjana, se protesta studentore duhet të mbetet e lidhur me shqetësimet e qytetarëve dhe të mos përdoret nga forcat politike. Sipas saj, në Shqipëri ka një nivel të lartë mosbesimi ndaj qeverisë dhe opozitës. Dedej theksoi se studentët nuk janë rreshtuar me asnjë parti, por kanë dalë në shesh për të shprehur pakënaqësitë e tyre. Për këtë arsye, ajo kërkoi që deputetët që mbajnë përgjegjësi për situatën e vendit të mos përpiqen të përfitojnë politikisht nga protesta. Dedej vlerësoi ndihmën e çdo qytetari që ka marrë pjesë në protestë, pavarësisht nëse është ose jo pjesë e Partisë Demokratike. Ajo përmendi edhe mbështetjen e selisë së PD-së, e cila, sipas saj, ka strehuar protestues, përfshirë miq të saj, duke i mbrojtur nga gazi lotsjellës, dhuna policore dhe situata të tjera të vështira. Studentja falënderoi gjithashtu personat që kanë ofruar asistencë ligjore për protestuesit.

Pjesë e shkurtër nga burimi. Artikulli i plotë dhe autorësia i përkasin botuesit origjinal.