Antiterrori kap protestuesin që u prezantua si gazetar dhe hapi GoFundMe: Ka bërë thirrje për dhunë

A. Koçi, i njohur në rrjetet sociale me emrin “Ari Shady”, është proceduar penalisht nga Policia, pasi dyshohet se ka nxitur veprime të dhunshme gjatë protestave të zhvilluara javët e fundit. Sipas njoftimit zyrtar të Policisë, 34-vjeçari dyshohet gjithashtu se ka hapur një fushatë në platformën GoFundMe, duke pretenduar se jeta e tij ishte në rrezik. Përmes kësaj fushate, ai ka mbledhur pak më shumë se 10 mijë paund, ndërsa në përshkrimin e saj thuhet se paratë do të përdoreshin për të mbështetur protestën. Një tjetër detaj i bërë publik nga Policia lidhet me një bexh që iu gjet Koçit gjatë kontrollit. Sipas autoriteteve, dokumenti përdorej për t’u paraqitur si gazetar, me qëllim shmangien e kufizimeve dhe shoqërimit nga efektivët. Bexhi është sekuestruar si provë materiale. Policia bën me dije se procedimi penal ndaj tij është kryer për veprën penale “Thirrjet publike për veprime të dhunshme”. Ndërkohë, pretendimet lidhur me mbledhjen e fondeve dhe përdorimin e dokumentit po paraqiten nga autoritetet si dyshime. Sakaq Arjan Koçi ka reaguar me një video të postuar në Instagram për këtë situatë.

Pjesë e shkurtër nga burimi. Artikulli i plotë dhe autorësia i përkasin botuesit origjinal.