Чупиќ удри по ЕХФ: Ова е апсурд - вложуваме милиони за само шест недели во Европа!

Тренерот на Вардар, Иван Чупиќ, упати жестоки критики кон Европската ракометна федерација (ЕХФ) поради новиот систем на натпреварување во Лигата на шампионите (ЛШ) и Европската лига, оценувајќи го како неразработен и штетен за екипите кои не се во тесниот круг на најбогати клубови. Според новиот формат, европската сезона за Вардар во најелитната конкуренција завршува за само месец и половина, што претставува драстично кратење во споредба со претходните години кога се играа меѓу 12 и 15 натпревари. Чупиќ смета дека ваквиот систем е кроен исклучиво за потребите на шесте до десетте најсилни европски екипи, на кои им се олеснува балансирањето на ростерот и одморањето на репрезентативците по големите натпреварувања во јануари, додека на клубовите како Вардар, Загреб, Букурешт и Целје им се одзема драгоцено искуство и континуитет.