Голманот на Вардар најави победничко збогување од Лигата на шампионите!

Двојниот европски шампион Вардар в среда ќе го пречека германскиот бундеслигаш Мелсунген во својот последен овосезонски натпревар во ракометната ЛШ. Скопскиот клуб веќе ги загуби сите математички шанси за пласман во следната фаза од елитното натпреварување, неодамнешната убедлива победа на гостувањето кај францускиот Нант донесе одлична и позитивна атмосфера во таборот на „црвено-црните“. За разлика од домаќините кои ќе играат растеретено, екипата на Мелсунген доаѓа во Скопје со силен резултатски императив бидејќи сè уште се бори за пласман во следната рунда. Голманот на Вардар, Милош Валах на денешниот прес потенцираше дека и покрај елиминацијата, екипата е максимално мотивирана да ја израдува домашната публика и победнички да ја заокружи европската сезона пред претстојните важни предизвици.