Поместувањето на гравитацијата кон Исток

Живееме во епоха на инстант-информации во која медиумскиот шум стана нов терен на конфликтот, а дневната политика во македонскиот и поширокиот регионален простор упорно се исцрпува во провинцијални баналности и краткорочни калкулации. Но, под таа бучава од дневни соопштенија, тектонските плочи на меѓународниот поредок се поместуваат според една неумолива историска закономерност: бидејќи глобалната економија неминовно се движи кон Исток, Силата (инфраструктурата) неминовно ја следи. За да се разбере оваа голема преселба на гравитацијата и начинот на кој таа ги редефинира сојузите од Медитеранот до Индо-Пацификот, потребно е најпрво да се напушти комотниот аналитички кафез на минатиот век.