Хрватска влегува во трката за вештачка интелигенција: инвестира речиси една милијарда евра

До 2032 година Хрватска планира да инвестира 932 милиони евра во развојот на вештачката интелигенција. Дел од овие средства ќе бидат насочени кон развој на голем јазичен модел за хрватскиот јазик, како и асистент со вештачка интелигенција за системот „е-Граѓани“ (e-Građani). Ова е наведено во Националниот план за развој на вештачката интелигенција, кој во петокот го претстави хрватскиот министер за правда, јавна управа и дигитална трансформација, Дамир Хабијан. Вкупните инвестиции до 2032 година се проценуваат на 932,1 милион евра, при што 382,1 милион евра се издвоени за првиот акциски план, кој го опфаќа периодот до 2028 година. Овој почетен акциски план содржи 33 мерки, а најголемиот дел од средствата е наменет за истражување, иновации и економски развој.