Јокиќ со првиот трипл-дабл сезонава иницира историскиот пресврт на Денвер (ВИДЕО)

Кошаркарите на Денвер Нагетс дојдоа до првата победа во новата сезона во НБА, откако во драматичен натпревар кој се решаваше по продолжение го совладаа Њу Орлеанс (141-135). „Нагетси“ стигнаа до триумф по негатива од дури 23 поени разлика во еден момент, со што го направија најголемиот пресврт на домашен терен во клупската историја, а вкупно трет најголем пресврт воопшто. Централна фигура на средбата беше Никола Јокиќ кој забележа нов трипл-дабл учинок од 35 поени, 15 скока и 10 асистенции. Ова за него беше вкупно 199-ти троен учинок во мечевите од регуларниот дел, со што сега заостанува само десет вакви остварувања зад апсолутниот рекордер Расел Вестбрук. Најефикасен играч во победничкиот табор беше Џамал Мареј кој го заврши мечот со импресивни 42 поени.