Што можеме да научиме од КП на Кина за политичката самореформа?

Како професор, проучувајќи ги политичките системи, конфликтите и меѓународните односи, често се навраќав на едно прашање: што се случува кога партиите ќе престанат да бидат средства за општествена промена и ќе се претворат во организации чија главна цел е да ја освојат и задржат власта? И тоа го прават за сопствена корист. Во многу повеќепартиски системи, изборите стануваат централна, понекогаш и единствена мерка за постоење демократија. Програмите се приспособуваат од еден изборен циклус до друг, ветувањата се во функција на потребите на кампањата, а партиската организација е подредена на лидерот и на тесниот круг околу него. Наместо да го менуваат општеството на подобро, партиите сè почесто се приспособуваат на сопствената потреба да опстанат, и тоа со добар буџет.