ФФМ: Сите три гола на дербито се правилно поништени

Фудбалската федерација на Македонија се огласи по дербито меѓу Шкендија и Вардар, одиграно во Гостивар во рамките на 11. коло од Првата македонска фудбалска лига, со јасен став дека сите три ВАР-интервенции на натпреварот биле исправни. Дуелот заврши без голови, но во центарот на вниманието се најдоа три поништени погодоци – еден на Шкендија и два на Вардар. Сите ситуации беа проверувани поради сомнеж за офсајд, а според официјалното соопштение на ФФМ, судиските одлуки биле во целосна согласност со Правилата на фудбалската игра и ВАР-протоколот. Од Федерацијата посочуваат дека спорните моменти се случиле во 30. минута, кога Шкендија постигнала гол, како и во 89. и 93. минута, кога Вардар двапати ја затресол противничката мрежа. Во сите три случаи, по проверката и повлекувањето на офсајд-линиите, било утврдено дека имало недозволена позиција.