Starlink ende nën kufizime, Kievi kërkon rikthimin e plotë të qasjes

Kufizimet në sistemin satelitor Starlink, që kontrollohet nga kompania SpaceX e Elon Musk, po vazhdojnë të pengojnë operacionet ushtarake të Ukrainës, duke ndikuar në përdorimin e dronëve sulmues dhe atyre interceptues të mbrojtjes ajrore. Sipas raportimeve, kufizimet e vendosura javën e kaluar kanë shkaktuar dështime në misione dhe humbje të konsiderueshme. Edhe pse presidenti amerikan, Donald Trump, kishte deklaruar se qasja në sistem ishte rikthyer plotësisht, deklaratat e fundit nga pala ukrainase tregojnë se kufizimet ende nuk janë hequr.