Охрид убедлив против турскиот ривал на стартот на Европскиот куп

Ракометарите на ГРК Охрид славеа убедлива победа над турски Спорт Тото со 36-24 (18-10) во првиот натпревар од второто коло на ЕХФ Европскиот куп, во кој го бранат трофејот освоен минатата година. Охриѓани одлично го започнаа натпреварот и поведоа со два гола разлика, додека гостите првиот погодок го постигнаа дури во третата минута. Спорт Тото успеа да се врати во игра и да израмни на 4-4, но не ја искористи можноста да поведе. Домашниот тим одговори со нова серија голови и постепено почна да ја зголемува предноста. Клучната разлика беше направена во завршницата на првото полувреме. Охрид поведе со 12-8 во 23. минута, а голманот Дино Славиќ со девет интервенции во првиот дел значително придонесе за сигурното водство. До паузата избраниците на Борис Ројевиќ ја зголемија предноста на убедливи 18-10.