Западните земји бараат од Ким да се откаже од нуклеарното оружје

Група западни земји, вклучувајќи ги Европската Унија, Соединетите Американски Држави, Британија и Јапонија, во заедничка изјава повторно ја повикаа Северна Кореја да се откаже од своите програми за развој на нуклеарно оружје и балистички ракети. Истовремено тие ги повикаа сите членки на Обединетите нации целосно да ги спроведуваат постоечките санкции. Во изјавата потпишана од ЕУ, САД, Канада, Британија, Франција, Германија, Италија, Холандија, Јапонија, Австралија, Нов Зеланд и Јужна Кореја, се потврдува посветеноста кон целта за „целосна, проверлива и неповратна денуклеаризација“ на Северна Кореја. Документот потсетува дека Европската Унија, Австралија и САД воведоа санкции во октомври насочени кон „користењето на странски работници, злонамерните сајбер активности и актерите вклучени во нелегалната соработка меѓу ДНРК и Русија“ од страна на Северна Кореја.