Пет нови животински видови пристигнаа во Зоолошката градина во Битола

Зоолошката градина во Битола доби пет нови животински видови преку соработката со Зоолошката градина во Белград, информираат од Зоо Битола. Новите жители се сервал, був, свет ибис, берберска овца и американски ракун. Тие веќе се сместени во своите живеалишта и се под надзор на ветеринарниот тим. Со нивното пристигнување, се проширува животинскиот фонд на битолската зоолошка градина, а посетителите ќе имаат можност одблизу да се запознаат со нови видови и нивните карактеристики. Од Зоо Битола посочуваат дека соработката и размената меѓу зоолошките градини се важни за збогатување на животинскиот фонд, унапредување на условите за животните и едукација на посетителите. Воедно, упатија благодарност до тимот на Зоолошката градина во Белград за успешната соработка и пријателството меѓу двете институции.