Уапсени четири лица за двата смртни случаи во Ѓорче Петров

Четири лица се лишени од слобода во врска со две разбојништва со смртни последици, извршени во скопските населби Хром и Ѓорче Петров, соопшти Министерството за внатрешни работи. Станува збор за А.С. (22), Х.Е. (20) и К.А. (58) од Скопје, како и М.Р. (26) од Струмица. Тие се сомничат за разбојништвата извршени на 22 октомври во Хром и на 27 октомври во Ѓорче Петров. Во координација со Основното јавно обвинителство Скопје, за осомничените е побаран краткотраен притвор заради обезбедување на доказите и продолжување на постапката. По комплетирањето на доказниот материјал ќе биде поднесена соодветна кривична пријава.