Në “Idrizovë” një mjek kujdeset për pothuajse 700 të dënuar, Avokati i Popullit alarmon

Në “Idrizovë” një mjek kujdeset për pothuajse 700 të dënuar, Avokati i Popullit alarmon Mungesa e mjekëve, pritjet e gjata për ekzaminime specialistike dhe problemet me sigurimin e ilaçeve janë ndër dobësitë më të mëdha në kujdesin shëndetësor në burgjet maqedonase, sipas një ankete të kryer nga Avokati i Popullit në 11 institucione korrektuese. Zëvendës Avokatja e Popullit Sonja Trifunovska theksoi se shtatë nga 11 institucione janë të mbipopulluara, ndërsa katër prej tyre nuk kanë staf të përhershëm mjekësor. Asnjë nga burgjet e vizituara nuk ka punonjës shëndetësorë në dispozicion 24 orë në ditë.Situata në burgun e Idrizovës është veçanërisht shqetësuese, ku një mjek kujdeset për rreth 691 të burgosur, megjithëse sipas standardeve të deklaruara ai duhet të shërbejë maksimumi për rreth 300. Nga ana tjetër, një infermiere ose teknik kujdeset për afërsisht 461 të burgosur. Një problem tjetër është se në disa burgje, terapia administrohet nga zyrtarët e burgut dhe ndonjëherë familjet duhet t’i sigurojnë vetë ilaçet. Kjo krijon rrezikun e ndërprerjeve të trajtimit, dozave të pasakta dhe shkeljeve të konfidencialitetit mjekësor.