„Ова е најава за она што го чека целиот Запад“, велат германските медиуми за протестите низ Европа

Бранот протести што зафатија повеќе европски земји, од Франција и Италија до Албанија, Белгија, Португалија и Шпанија, предизвика загриженост и во Германија. Германските медиуми предупредуваат дека незадоволството на младите, растечките трошоци за живот и сè помалите можности за образование и вработување би можеле да доведат до нови општествени судири низ Европа. Додека во некои земји демонстрациите се одвиваат мирно, во Франција, Италија и Албанија протестите беа проследени со насилство, палење објекти и ограбување продавници, пренесува Дојче веле. Германските медиуми особено внимание им посветуваат на случувањата во Франција, каде што протестите траат со недели, а насилството дополнително ги продлабочи политичките и општествените поделби во пресрет на претседателските избори во 2027 година.