Kasami diskuton bashkëpunimin me Rrjetin e Grave në Shkencë

Shkup, 27 tetor, Zhurnal.mk – Kryetari i Komunës së Tetovës, Bilall Kasami, ka zhvilluar një takim me përfaqësuese të Rrjetit të Grave në Shkencë, ku u diskutuan mundësitë e bashkëpunimit të ndërsjellë dhe mbështetja e nismave që synojnë fuqizimin e grave dhe rritjen e kontributit të tyre në shoqëri. Gjatë takimit, bashkëbiseduesit shqyrtuan mundësinë e nënshkrimit të një memorandumi bashkëpunimi ndërmjet Komunës së Tetovës dhe Rrjetit të Grave në Shkencë, me qëllim krijimin e një baze të qëndrueshme për bashkëpunim institucional dhe realizimin e aktiviteteve të përbashkëta në të ardhmen. Kasami theksoi rëndësinë e mbështetjes së grave në fushën e shkencës, arsimit dhe jetës publike, duke vlerësuar se përfshirja e tyre më aktive kontribuon drejtpërdrejt në zhvillimin e shoqërisë.