Чупиќ: Сакаме победа во Нант!

Тренерот на Вардар 1961, Иван Чупиќ, најави дека неговиот тим ќе се бори за победа на гостувањето кај Нант. Вардар мора да ја покаже препознатливата борбеност и вистинскиот менталитет, без оглед на околностите. „Сакаме да победиме и да останеме конкурентни, како што бевме и досега. Знаеме дека е многу тешко да се победи во Нант. Не сакам да размислуваме дека е доволно само да одиграме добар натпревар и да оставиме позитивен впечаток. Мораме да се бориме и да го покажеме вистинскиот пристап и менталитет, како што сме правеле секогаш. Тоа никогаш не смее да недостасува во нашата игра. Ова се тешки моменти за нас. Имавме високи очекувања и се надевавме дека ќе ја минеме групната фаза. Сепак, сакаме да испратиме порака за иднината - дека сè уште сме тука, дека сме конкурентни и дека овој тим продолжува да се развива. Секој натпревар во Лигата на шампионите за нас е како финале. Мораме да се претставиме во вистинско светло и да учиме од секој меч“, истакна тренерот на Вардар.