Барса го изгуби Ел Класико, ама заработи 19 милиони евра

Иако Барселона го загуби неделното Ел Класико од Реал Мадрид со 1-2, каталонскиот клуб има сериозна причина за задоволство кога станува збор за финансиите. Натпреварот на Камп Ноу донесе рекордни приходи од продажбата на билети, а историски резултат оствари и клупската продавница. Според објавените податоци, Барселона инкасирала 19.105.768 евра од продажбата на билети, што е најголем приход во историјата на клубот од еден натпревар. Со тоа е надминат претходниот рекорд од мај годинава, кога дуелот со истиот ривал донесе 16.465.731 евро. Интересно е што овојпат на стадионот имаше помалку гледачи. На претходното дерби присуствувале 62.213 навивачи, додека неделниот натпревар го следеле околу 62.000 гледачи. Сепак, повисоките цени на билетите и зголемената понуда на ВИП-места овозможиле значително поголема заработка. Просечната цена на билетот достигнала 984 евра без ДДВ, што претставува зголемување од околу 10 проценти во споредба со претходната сезона. Уште поголеми приходи донеле премиум-местата, чија просечна цена изнесувала 2.727 евра. Приходите од ВИП-понудата пораснале за дури 350 проценти.