Zgjerohet qasja në sensorët për matjen e sheqerit në gjak

Shkup, 26 tetor Zhurnal.mk – Ministria e Shëndetësisë njofton se po punon vazhdimisht për përmirësimin e kujdesit ndaj personave me diabet, përmes sigurimit të terapive bashkëkohore, pajisjeve mjekësore dhe kushteve më të mira për monitorimin dhe kontrollin e sëmundjes. Sipas Ministrisë, përmes furnizimit të fundit publik janë siguruar sensorë për monitorimin e glukozës për 800 persona me diabet të tipit 1, në përputhje me Programin për diabetin dhe rekomandimet e Komisionit Kombëtar për Diabetin. Kontrata e lidhur në prill të këtij viti është e vlefshme deri në prill të vitit 2028. Përmes këtij furnizimi janë siguruar gjithashtu sasi më të mëdha të insulinës dhe terapive bashkëkohore kundër diabetit.