Protestë të mërkurën në Prishtinë për përgjegjësi institucionale ndaj vrasjes së grave

Kolektivi për Mendim dhe Veprim Feminist ka bërë thirrje për protestë të mërkurën, në orën 16:00, në sheshin “Zahir Pajaziti” në Prishtinë, me moton “Vrasja e grave të trajtohet si urgjencë kombëtare”. Organizatorët u kërkojnë qytetarëve t’i bashkohen mobilizimit kundër dhunës ndaj grave dhe të kërkojnë drejtësi për viktimat e femicidit, si dhe përgjegjësi nga institucionet për rastet e vrasjeve dhe dështimet e pretenduara në parandalimin e tyre. Thirrja për protestë lidhet edhe me vrasjen e fundit të Arlinda Zekajt. Sipas Kolektivit, ajo kishte kërkuar ndihmë para se të vritej, ndërsa ky rast, bashkë me rastet e tjera të femicidit, tregon nevojën për një reagim më të fortë institucional ndaj paralajmërimeve për dhunë dhe rreziqeve që u kanosen grave.