Gjykata Supreme vendos shtyrjen me dy orë të votimit presidencial në Brazil

Votimi për zgjedhjet presidenciale në Brazil do të vijojë edhe për dy orë të tjera, pasi Gjykata Supreme urdhëroi zgjatjen e procesit. Sipas planit fillestar, qendrat e votimit do të mbylleshin në orën 5 pasdite. Të dy kandidatët kërkuan më shumë kohë për votuesit. Flavio Bolsonaro, kandidati konservator dhe djali i ish-presidentit të dënuar Jair Bolsonaro, kërkoi zgjatjen e votimit në tre shtete, duke iu referuar kushteve të këqija atmosferike. Presidenti në largim, Luiz Inacio Lula da Silva, ndërkaq, u kërkoi autoriteteve zgjedhore ta zgjasnin procesin në nëntë shtete, pasi fushata e tij raportoi ndërprerje të transportit publik. Një numër i madh brazilianësh varen nga transporti publik për të udhëtuar drejt qyteteve ku janë të regjistruar dhe për të votuar. Në Bahia, bastion i Lulas në verilindje të Brazilit, një gjykatë urdhëroi arrestimin e një zyrtari të lartë të transportit në Salvador, nën dyshimin se kishte dhënë urdhër për kufizimin e shërbimeve të autobusëve.