33 tekste shkollore hiqen nga përdorimi, Sulejmani: Programet mësimore do të modernizohen

Ministria e Arsimit dhe Shkencës ka planifikuar tërheqjen e 33 librave shkollorë, me synim përmirësimin e cilësisë së teksteve dhe përditësimin e programeve mësimore. Zëvendësministri i Arsimit, Driton Sulejmani, bëri të ditur se bëhet fjalë për libra të klasës së parë, të dytë, të katërt dhe të pestë, në gjuhën maqedonase, shqipe, turke dhe serbe. Sipas Sulejmanit, nga përdorimi janë hequr tashmë edhe tekstet e klasës së pestë dhe të shtatë të arsimit fillor, si dhe dy libra për vitet e para të shkollimit të mesëm. Nxënësit, ndërkohë, janë pajisur me tekstet e reja. Zëvendësministri theksoi se ndërhyrjet do të përfshijnë si rritjen e cilësisë së librave, ashtu edhe modernizimin e programeve që do të ndjekin nxënësit. Ai rikujtoi se Ministria e Arsimit dhe Shkencës ka tërhequr librat e klasës së pestë dhe të shtatë, si dhe tekstet për vitin e parë dhe të dytë të arsimit të mesëm. Librat e rinj për këto nivele tashmë u janë shpërndarë nxënësve dhe janë në përdorim.