Kompania pranon se syzet inteligjente të Meta kanë regjistruar biseda dhe pse komanda e aktivizimit nuk është dhënë

Syzet inteligjente Ray-Ban të Meta janë përballur me shqetësime të reja për privatësinë, pasi disa përdorues raportuan se pajisjet regjistronin biseda edhe pa aktivizuar komandën zanore “Hey Meta”. Kompania konfirmoi se problemi është zgjidhur, por nuk shpjegoi se çfarë e shkaktoi atë. Sipas raportimeve të publikuara në Reddit, regjistrimet audio dhe transkriptimet e bisedave shfaqeshin në aplikacionin Meta AI, megjithëse opsioni “Respond without Hey Meta” ishte i çaktivizuar. Në disa raste, drita e bardhë e njoftimit aktivizohej ndërsa përdoruesit flisnin normalisht. Problemi nuk duket se kufizohej te një pajisje e vetme. Përdoruesit raportuan të njëjtën sjellje në tri palë syze, përfshirë modele të gjeneratës së dytë dhe të tretë, pas instalimit të një përditësimi të firmuerit.