One Albania kërkon 1,000 lekë borxh, klientët kërcënohen me gjykatë dhe përmbarim!

Pas skandalit të mikrokredive, ku qytetarë të shumtë denoncuan rritjen e detyrimeve përmes kamatave, komisioneve dhe tarifave përmbarimore, një tjetër rast po ngre shqetësime për mënyrën e mbledhjes së borxheve në Shqipëri. Këtë herë, në qendër të denoncimit është kompania e telefonisë One Albania dhe njoftimet që disa prej klientëve të saj pretendojnë se kanë marrë nga shoqëri të specializuara për mbledhjen e detyrimeve. Qendra e Shërbimeve Ligjore Evropiane (CELS) bën me dije se pranë saj janë paraqitur biznese dhe individë që kanë marrë kërkesa për shlyerjen e detyrimeve të mbartura, përmes njoftimeve të dërguara nga kompani si ODMC Albania. Sipas rasteve të raportuara, bëhet fjalë edhe për shuma relativisht të vogla, rreth 1,000 lekë të reja për çdo numër kontrate. Por ajo që ka ngritur shqetësimin e klientëve është afati prej 10 ditësh për kryerjen e pagesës dhe paralajmërimi se, në të kundërt, çështja mund të ndiqet në rrugë gjyqësore dhe përmbarimore.