NASA publikon imazhin e “buzëqeshjes kozmike” 4.5 miliardë vite dritë larg Tokës

NASA ka rikthyer vëmendjen te një prej imazheve më të veçanta të fotografuara nga teleskopi hapësinor Hubble, ku një grumbull galaktikash duket sikur po buzëqesh. Imazhi i objektit SDSS J1038+4849, i publikuar fillimisht në vitin 2015, tregon dy pika të ndritshme që ngjajnë me sy, një pikë më të vogël që duket si hundë dhe harqe drite që formojnë një fytyrë të buzëqeshur gjigante në hapësirë. Megjithatë, kjo pamje nuk është rezultat i ndonjë strukture që ngjan me fytyrë. Iluzioni krijohet nga një fenomen fizik i njohur si lentet gravitacionale, përmes të cilit graviteti i jashtëzakonshëm i objekteve masive përkul hapësirën dhe kohën dhe ndryshon rrugën e dritës që vjen nga galaktikat më të largëta. Dy “sytë” e buzëqeshjes janë galaktika të ndritshme brenda grumbullit, ndërsa vijat e lakuara përfaqësojnë dritën e galaktikave që ndodhen prapa tij. Masa e madhe e grumbullit vepron si një lente natyrore, duke e përkulur dhe zmadhuar këtë dritë përpara se ajo të arrijë te teleskopi Hubble.