Shërbimi shëndetësor në zonat rurale, FSDKSH synon rritjen e aksesit për banorët e fshatrave

Banorët e zonave rurale të Kukësit, veçanërisht ata që jetojnë larg qendrave urbane, kanë nevojë për shërbime shëndetësore të aksesueshme dhe në kohë. Në këtë drejtim, Fondi i Sigurimit të Detyrueshëm të Kujdesit Shëndetësor financon shërbime përmes kontratave me ofruesit, ndërsa garantimi i aksesit për qytetarët mbetet një nga çështjet kryesore të funksionimit të skemës. “Fatmirësisht, qarku i Kukësit ka një staf mjekësor në çdo cep të tij, me qendra shëndetësore. Këto kanë gjithashtu fonde të mjaftueshme, sidomos për mirëmbajtjen e objekteve dhe blerjen e medikamenteve. Ndërsa për rimbursimin e ilaçeve, kjo çështje ndiqet nga mjekët e familjes, të cilët gjenden në çdo fshat të madh të qarkut të Kukësit”, u shpreh Liman Morina, Drejtor i FSDKSH-së, Kukës. Përveç financimit të shërbimeve, një tjetër element i rëndësishëm është monitorimi i punës së qendrave shëndetësore. Kontrollet synojnë të vlerësojnë respektimin e standardeve të shërbimit dhe zbatimin e kushteve për të cilat institucionet kanë marrë përsipër të ofrojnë kujdes shëndetësor për qytetarët.