122 milionë euro më shumë për pagat dhe pensionet në buxhetin e vitit 2026

Ndryshimet e propozuara përfshijnë 102 milionë euro për paga, ku hyjnë paga e 13-të dhe kompensimi retroaktiv për përvojën e punës, si dhe 20 milionë euro për pensionet bazike. Fondi Monetar Ndërkombëtar ka tërhequr vërejtjen për shtimin e deficitit dhe ndikimin që shpenzimet e vazhdueshme mund të kenë në financat publike. Qeveria e Kosovës ka kërkuar rishikimin e ndarjeve buxhetore për vitin 2026, duke propozuar shtimin e 122 milionë eurove për shpenzimet e pagave dhe pensioneve. Projektligji për ndryshimin dhe plotësimin e Ligjit për Ndarjet Buxhetore është miratuar në lexim të parë dhe pritet të diskutohet të enjten në lexim të dytë në Kuvendin e Kosovës, afërsisht dy muaj para mbylljes së vitit fiskal. Nga shuma e propozuar, 102 milionë euro do të vendosen në kategorinë “Paga dhe Shtesa” të nënprogramit “Kontingjencat” në Ministrinë e Financave. Fondet janë planifikuar për pagesën e pagës së 13-të dhe kompensimin retroaktiv të përvojës së punës, në përputhje me Aktgjykimin KO79/23 të Gjykatës Kushtetuese.