A po “peshkon” Rama njerëz pranë protestës me skemën e drejtorëve, që të shuajë revoltën e tyre

Pas refuzimit të dialogut nga studentët dhe kërkesës së pedagogëve për dorëheqjen e kryeministrit, vala e largimeve në administratë ngre pikëpyetje për strategjinë e Ramës. A do të kërkojë kryeministri figura me ndikim në universitete dhe pranë protestës për të krijuar një kanal të ri komunikimi, për të zbutur zemërimin dhe për ta nxjerrë qeverinë nga presioni? Mbi 50 drejtues institucionesh dhe drejtorish raportohet se kanë dhënë dorëheqjen, pas kërkesës së Edi Ramës drejtuar ministrave për të larguar drejtuesit e strukturave në varësi. Lëvizja vjen në një moment kur kryeministri përballet me një krizë që nuk po kufizohet më te përplasja me opozitën, por po merr formën e një konflikti të hapur me studentët, gjimnazistët dhe pedagogët. Në këtë klimë, ndryshimet në administratë mund të kenë një rëndësi që shkon përtej emrave që do të largohen nga zyrat shtetërore. Pyetja që shtrohet është nëse Rama po kërkon të riorganizojë administratën për arsye të performancës, apo nëse vala e dorëheqjeve është edhe pjesë e një përpjekjeje më të gjerë për të ndryshuar raportet me grupet që po i kundërvihen qeverisë.