Regjisori Jafar Panahi dënohet me pesë vjet e një muaj burg, i sekuestrohen pasuritë

Jafar Panahi, regjisori iranian fitues i Palmës së Artë në Festivalin e Filmit në Kanë, është dënuar me pesë vjet e një muaj heqje lirie. Vendimi i gjykatës përfshin edhe konfiskimin e pasurive të tij, si dhe ndalimin për dy vjet të udhëtimeve jashtë vendit dhe përdorimit të rrjeteve sociale. Lajmin për vendimin e ri ndaj një prej figurave më të rëndësishme të kinemasë iraniane e bëri publik avokati i tij, Mostafa Nili, në një deklaratë për median iraniane Emtedad. Panahi, 66 vjeç, u gjykua dhe u dënua në mungesë. Nili tha se, përveç burgimit, gjykata ka urdhëruar sekuestrimin e pronave të regjisorit dhe i ka vendosur kufizimet dyvjeçare. Ende nuk dihet se cilat janë akuzat e sakta që çuan në këtë vendim.