Apeli Administrativ pezullon bojkotin e avokatëve në GJKKO

Gjykata Administrative e Apelit vendosi të mërkurën të pezullojë zbatimin e dy vendimeve të marra nga Këshilli i Përgjithshëm i Dhomës Kombëtare të Avokatisë, për bojkotimin e seancave gjyqësor dhe atyre të hetimit paraprak në Gjykatën e Posaçme të Shkallës së Parë, GJKKO. Vendimi u mor nga gjyqtarja Enerjeta Shehaj, e cila pranoi kërkesën e Shoqatës së Avokatëve Antikorrupsion Shqiptare, SHAASH, për marrjen e sigurimit të padisë duke pezulluar zbatimin e vendimeve të Dhomës Kombëtare të Avokatisë për bojkotimin e seancave në GJKKO. Kundër kësaj vendimarrjeje lejohet të kryhet rekurs në Kolegjin Administrativ të Gjykatës së Lartë brenda pesë ditëve, nga momenti i komunikimit të vendimit të arsyetuar. Kryetari i Dhomës së Avokatisë, Maksim Haxhia, gjatë një komunikimi telefonik pasditen e të mërkurës tha se, në atë moment nuk kishte mundësi të vijonte bisedën për shkak të një angazhimi. Konflikti mes Gjykatës së Posaçme të Shkallës së Parë dhe Dhomës Kombëtare të Avokatisë nisi më 1 shtator, kur hyri në fuqi një rregullore e re për sigurinë dhe sjelljen në ambientet e gjykatës, e cila ndalon mbajtjen dhe përdorimin e telefonave celularë në sallat e gjykimit.