Arrestohet në Gjermani një shtetas ukrainas, dyshohet për spiunazh në favor të Rusisë

Një shtetas ukrainas është arrestuar në Gjermani, nën dyshimin për spiunazh në favor të Rusisë, njoftoi Prokuroria Federale gjermane. I dyshuari, i identifikuar nga prokurorët si Vadym Y., u ndalua në landin e Brandenburgut. Sipas autoriteteve, ai dyshohet se kishte qenë në kontakt me një shërbim sekret rus përmes një ndërmjetësi, të paktën që nga korriku i vitit 2025. Prokuroria pretendon se ai kishte mbledhur informacione ushtarake, përfshirë të dhëna mbi prodhimin e automjeteve të blinduara, municioneve dhe eksplozivëve, si dhe informacione për personelin dhe instalimet ushtarake në zona të rëndësishme për mbrojtjen e krahut lindor të NATO-s.