MSH: Fushata kundër gripit po merr ritëm, vaksinat mjaftojnë për të gjithë të regjistruarit

Prej nisjes së fushatës së vaksinimit, më 14 tetor, janë regjistruar 66.821 qytetarë, ose mesatarisht 4.455 aplikime në ditë. Në mesin e tyre dominojnë personat mbi 65 vjeç, ndërsa pas tyre vijnë qytetarët me sëmundje kronike. Sipas Ministrisë së Shëndetësisë, më së shumti aplikime janë bërë në Shkup, 19.767, pasuar nga Manastiri me 4.845, Prilepi me 3.844, Strumica me 3.585 dhe Tetova me 3.581. Deri tani janë caktuar 6.710 termine, prej të cilave janë realizuar 3.266 vaksinime. Në tri ditët e fundit të punës janë vaksinuar afërsisht 1.000 qytetarë në ditë. Nga terminet e kaluara janë përmbushur 86,7 për qind, ndërsa 503 persona, apo 13,3 për qind, nuk janë paraqitur.