Arsimi që proteston për politikë, por që prodhon analfabetë

Nga Ylli Manjani Për hir të argumentit, po supozoj se nesër Edi Rama, Sali Berisha dhe të gjitha partitë e sotme zhduken nga skena politike. Fundja një ditë ata do ikin. Por po e supozoj se ndodh tani. Studentët, pedagogët dhe arsimtarët që protestojnë kundër tyre shpallin fitoren e madhe politike. Shkolla u bë më e mirë?! Universitetet shqiptare filluan të prodhojnë dije dhe diploma me vlerë ndërkombëtare?! Studentët u bënë më të aftë dhe pedagogët më të zotë?! Apo të diplomuarit tanë do të shndërrohen brenda natës në elitën intelektuale të shoqërisë?! E bëj këtë pyetje sepse, në gjithë këtë zhurmë politike, nuk kam dëgjuar asnjë plan serioz, madje as një kërkesë konkrete, se si duhet të ndryshojë arsimi shqiptar.