E bujshme/ Arsenali eliminohet nga “peshkatarët” e Fleetwood Town nga Carabao Cup

Arsenali ka pësuar një eliminim të papritur në Carabao Cup, duke u mposhtur nga Fleetwood Town, skuadra e kategorisë së katërt të futbollit anglez. Pas barazimit 1-1 në kohën e rregullt, vendasit triumfuan 5-3 në gjuajtjet e penalltive, duke siguruar një kualifikim historik për në raundin tjetër. Takimi në stadiumin Highbury nisi me një episod të pazakontë, pasi prania e një droni mbi fushë detyroi arbitrin të ndërpriste përkohësisht lojën. Pas rifillimit, Fleetwood surprizoi londinezët, duke kaluar në avantazh në minutën e 21-të me golin e Loupalo-Bi. Arsenali u përball kështu me presionin për të reaguar ndaj një kundërshtari që nuk kishte ndërmend të dorëzohej lehtë. Skuadra e drejtuar nga Mikel Arteta e rriti ritmin pas pushimit dhe gjeti golin e barazimit në minutën e 50-të. Viktor Gyökeres dërgoi topin në rrjetë, duke shënuar golin e tij të parë sezonal me fanellën e Arsenalit. Megjithatë, pavarësisht përpjekjeve për të përmbysur rezultatin, “Topçinjtë” nuk arritën të shënonin golin e fitores.