Irani, gati për diplomaci dhe mbrojtje, Teherani e lidh rihapjen e Hormuzit me një marrëveshje me SHBA-në

Irani shprehet i gatshëm të vijojë negociatat me Shtetet e Bashkuara, por paralajmëron se do të mbrohet në rast të një sulmi të ri ushtarak. Ministri i Jashtëm iranian, Abbas Araghchi, tha se kontaktet mes Teheranit dhe Uashingtonit po vazhdojnë përmes ndërmjetësve, përfshirë Pakistanin dhe Katarin. Sipas tij, Irani i ka paraqitur palës amerikane një nismë shtatë ditore, që parashikon rihapjen e plotë të Ngushticës së Hormuzit në ditën e gjashtë, nëse pranohen kushtet e Teheranit. Araghchi pretendoi se Uashingtoni ka pranuar kushtet iraniane, por ka kërkuar përfshirjen e disa pikave të tjera në marrëveshje. Kryediplomati theksoi se Irani kërkon fillimisht zbatimin e zotimeve të përcaktuara në memorandumin e mirëkuptimit të arritur në Islamabad. Vetëm pas përmbushjes së tyre, sipas tij, mund të zhvillohen bisedime për çështjet e tjera.