BE-ja planifikon zgjerimin e kompetencave të Frontex-it për dëbimet, OJQ-të kërkojnë më shumë kontroll

Një reformë e Bashkimit Europian synon t’i japë Frontex-it rol më të gjerë në kthimin e migrantëve të parregullt, duke përfshirë mundësinë për të ndihmuar në deportimin e tyre nga një vend jashtë BE-së drejt një tjetri. Komisioni Europian pritet të paraqesë paketën e re të martën, raportoi Euronews. Sipas ndryshimeve të propozuara, agjencia do të mund të bashkëpunojë me autoritetet e vendeve joanëtare, mes tyre edhe shtetet e Afrikës së Veriut, për t’i kthyer migrantët në vendet nga vijnë. Frontex-i mund të përfshihet edhe në dëbimet nga qendrat e kthimit që vendet e BE-së synojnë të hapin në shtete të treta. Pesë qeveri europiane janë në bisedime për ngritjen e qendrës së parë të këtij lloji, e cila pritet të nisë punën më 2027.