Avokati i Popullit: Mungesa e personelit mjekësor në burgjet e Maqedonisë

Personat që vuajnë dënimin ose janë të privuar nga liria përballen me vështirësi për të marrë shërbime shëndetësore, kontrolle te specialistët dhe terapi të rregullt. Avokati i Popullit, Faton Selami, thekson se ata kanë të drejtë për kujdes mjekësor në të njëjtin nivel si qytetarët e tjerë dhe se kjo e drejtë duhet respektuar. Ai vëren se sfidat e burgjeve shtrihen në disa fusha, jo vetëm te kujdesi shëndetësor. “Problemet në sistemin e burgjeve janë komplekse dhe përfshijnë shumë segmente, si kushtet e akomodimit, higjienën, ushqimin, risocializimin, sistemin arsimor e të tjera. Kujdesi shëndetësor është një prej tyre, por do ta cilësoja si segment shumë të rëndësishëm, qoftë për shërbimet parësore, dytësore apo tretësore, qoftë për kujdesin stomatologjik”, u shpreh Faton Selami. Sonja Trifunovska vlerëson se për të përmirësuar kujdesin shëndetësor në burgje nevojitet bashkërendim mes disa fushave. Sipas saj, problemet kryesore lidhen me mungesën e personelit dhe shpërndarjen jo të barabartë të tij.