Nga Dorina e “Një vonesë e vogël” tek një jetë larg Shqipërisë: Sekretet e Juna Tomorrit

Për një brez të tërë shqiptarësh, ajo do të mbetet gjithmonë Dorina, vajza e vogël që fitoi zemrat e publikut në filmin e dashur “Një vonesë e vogël”, në vitin 1982. Por, pas më shumë se katër dekadash, historia e Juna Tomorrit është shumë më tepër se një kujtim i bukur kinematografik. Në një rrëfim nga Gjermania, Juna rikthehet në fëmijërinë që e lidhi me ekranin, emocionet e xhirimeve në Kinostudio dhe kujtimet e paharrueshme me regjisoren e madhe Xhanfize Keko. Ajo tregon edhe një sekret të provave: pse iu kërkua të mos zbulonte se ishte vajza e aktores Eva Pëllumbi. Filmi, që nis me një grup fëmijësh të vendosur të urojnë mësuesen e tyre për 7 Marsin, u kthye në një histori që vazhdon të prekë breza të tërë. Për Junën, xhirimet ishin ndër përjetimet më të bukura të fëmijërisë, aq sa, edhe pse ishte pak gjumashe, zgjohej herët vetëm për të shkuar në Kinostudio.