Piano dhe flaut në Lezhë, Synjona Paplekaj dhe Anxhela Hammad në koncert recital

Skena e Pallatit të Kulturës në Lezhë u kthye në një hapësirë muzikore. Tingujt e pianos dhe flautit sollën një mbrëmje të veçantë për publikun, në recitalin e dy artisteve, Synjona Paplekaj dhe Anxhela Hammad. Përmes veprave të kompozitorëve të njohur si Albeniz, Bartok, Poulenc, Fauré e Telemann përcollën tek publiku një repertor që udhëtoi mes periudhave dhe stileve të ndryshme të muzikës klasike. Pianoja dhe flauti u ndërthurën në një dialog të gjallë muzikor. Për të dy artistet pjesëmarrëse, aktivitete të tilla synojnë të krijojnë edhe një lidhje më të fortë të rinjve me artin dhe muzikën.