Alpine po përgatit një sportiv elektrik 2+2 me pamje moderne

Alpine është duke zhvilluar një veturë sportive elektrike me katër ulëse, e cila nuk do të marrë elemente stilistike nga modelet e vjetra të markës. Drejtori ekzekutiv Philippe Krief ka vendosur që automjeti të ndjekë një gjuhë krejtësisht bashkëkohore, pas diskutimeve të brendshme mes ekipeve të dizajnit. Modeli i ri do të ketë konfigurim 2+2 ulëse. Disa stilistë propozuan që ai të merrte frymëzim nga Alpine A310, vetura me siluetë në formë pyke e prodhuar gjatë viteve 1970 dhe 1980, transmeton Telegrafi. Megjithatë, një grup tjetër brenda kompanisë favorizoi një qasje më të pastër dhe futuriste, të ndikuar nga koncepti Alpenglow. Krief e ka përjashtuar rikthimin te dizajni klasik, duke theksuar se vetura do të ketë karakter të pavarur dhe një pamje “shumë, shumë moderne”.